53 Moil Athluchtaithe Feithiclí Leictreacha Nua ag Teacht chuig Bóithre na hÉireann
Inniu d’fhógair an tAire Iompair Darragh O'Brien suíomhanna na 53 mol athluchtaithe ardchumhachta nua a bheidh ag freastal ar an bhflít feithiclí leictreacha (EV) atá ag leathnú i gcónaí feadh gréasán bóithre náisiúnta na hÉireann. Cuirfear beagnach €8 milliún ar fáil chun tacú le deontais le haghaidh bonneagar athluchtaithe ag na suíomhanna áirithe seo, agus beidh luchtairí i bhfeidhm faoi dheireadh na bliana seo.
Cuirfidh na suíomhanna nua seo 175 phointe athluchtaithe nua, tapa agus sárthapa, ar fáil, ag 53 láthair feadh gréasán na mbóithre náisiúnta, rud a fhágfaidh go mbeidh sé níos tapúla agus níos éasca do thiománaithe na bhfeithiclí leictreacha breisiú a dhéanamh agus iad ar thurais níos faide.
Is cuid de phlean níos leithne é an fógra seo chun líonra athluchtaithe iontaofa a thógáil ar fud na tíre, le 60km nó níos lú idir na moil athluchtaithe.
Dúirt an tAire O’Brien: “Tá céimeanna praiticiúla dáiríre á nglacadh againn chun go n-oibreoidh feithiclí leictreacha do chách. Le níos mó luchtairí, níos mó rogha, agus níos mó tacaíochta, tá súil againn go mbraithfidh níos mó daoine muiníneach as an aistriú go leictreachas. Is céim thábhachtach sa phróiseas sin iad na luchtairí ardchumhachta seo. Táimid tiomanta do chóras iompair inbhuanaithe agus níos glaine a thógáil, mar sin ní mór go mbeidh sé éasca athluchtú, is cuma cá bhfuil tú.”
Maoinítear na moil athluchtaithe tríd an tionscnamh um Fheithiclí Saothair Éadroim (LDV) arna oibriú ag Feithiclí Astaíochtaí Nialasacha Éireann (ZEVI), agus arna sheachadadh ag Bonneagar Iompair Éireann (TII). Dhírigh an chéim seo den tionscnamh ar níos mó ná 1,200km de bhóithre náisiúnta aonbhealaigh. Fiontair amhail oibreoirí peitril/stáisiúin seirbhíse, úinéirí carrchlóis, óstáin, ollmhargaí/ionaid díolta, agus fiontair eile a bhfuil suíomhanna acu atá insroichte don bpobal, d’fhéadfaidís iarratas a dhéanamh trí phróiseas deontais iomaíoch le haghaidh cistiúcháin. Is é €7.9 milliún an leithdháileadh iomlán don ghné seo.
Dúirt Peter Walsh, Príomhfheidhmeannach TII:
“Ag obair i gcomhpháirtíocht le ZEVI agus leis an earnáil phríobháideach, tá an scéim seo ag cabhrú linn bonneagar a thógáil gur féidir le daoine brath air: tapa, éifeachtúil agus insroichte.”
Cuirfidh an 53 mhol athluchtaithe feabhas suntasach ar an gcumhdach ar na bóithre seo. Leanfar den obair amach anseo chun aghaidh a thabhairt ar aon chodanna den líonra 1,200km a dteastaíonn tacaíocht bhreise uathu, i gcás nárbh fhéidir dámhachtainí leordhóthanacha a dhéanamh faoin gcéim áirithe seo de chlár na scéime deontais.
Is cloch mhíle mhór eile é an fógra seo faoi Phlean Náisiúnta na hÉireann don Líonra Luchtaithe Feithiclí Leictreacha, atá dírithe ar athluchtú feithiclí leictreacha a dhéanamh insroichte i ngach cearn den tír; ó mhótarbhealaí go bóithre tuaithe, agus ó chathracha go bailte beaga.
Tá sé seo mar chuid de phlean níos leithne, an Plean Luchtaithe Feithiclí Leictreacha Líonra Bóithre Náisiúnta ZEVI, plean a dháil amach maoiniú deontais roimhe seo chun 131 pointe athluchtaithe ardchumhachta nua a sheachadadh ag 17 suíomh feadh an líonra mótarbhealaigh/dé-bhealaigh. Tá scéim bhreise ar bun faoi láthair freisin chun tacú le bonneagar athluchtaithe thar 3,000km eile den ghréasán bóithre náisiúnta, agus dúnadh na hiarratais i mí an Mheithimh.
Comhlánaíonn sé freisin na tacaíochtaí eile atá i bhfeidhm cheana féin; ina measc, an deontas chun feithicil leictreach a cheannach, deontais luchtaire baile, agus an CCF (VRT) laghdaithe le haghaidh feithiclí leictreacha.
