90 Mol Athluchtaithe Nua d’Fheithiclí Leictreacha ag teacht chuig bóithre ar fud na hÉireann

Beidh beagnach €10 milliún á leithdháileadh chun tacú le deontais le haghaidh bonneagar athluchtaithe ag na suíomhanna roghnaithe.

Cuirfidh na suíomhanna nua seo 192 pointe athluchtaithe tapa nua ar fáil, le meán acmhainn de 250kW de ghnáth, ag 90 suíomh feadh an líonra príomhbhóithre náisiúnta agus na bóithre tánáisteacha.

Tá an fógra mar chuid de phlean níos leithne chun líonra athluchtaithe iontaofa a thógáil ar fud na tíre, agus meastar go mbeidh an fad idir moil athluchtaithe 30km nó níos lú.

 "Is é fógra an lae inniu an chéim mhór dheireanach dár dtionscnamh Feithiclí Saothair Éadroma, i ndiaidh na scéimeanna Céim 1 agus Céim 2 roimhe seo, agus comhlánaíonn sé an tsraith infheistíochtaí seo inár líonra náisiúnta luchtaithe feithiclí leictreacha. Le chéile, tá sé mar aidhm ag na scéimeanna seo a chinntiú go mbeidh rochtain iontaofa ag tiománaithe ar fud na hÉireann ar athluchtú ardchumhachta, rud a fhágfaidh go mbeidh an t-aistriú go leictreach praiticiúil agus áisiúil. Rud tábhachtach, tabharfaidh an infheistíocht seo athluchtú feithiclí leictreacha ar ardchaighdeáin, go ardchumhachtach chuig áiteanna níos tuaithe freisin, rud a chabhróidh le geilleagair áitiúla a chur chun cinn, tacú le turasóireacht, agus forbairt réigiúnach a neartú."

Aire Iompair, Darragh O'Brien

 "Tá áthas orm go bhfuil na mol athluchtaithe feithiclí leictreacha seo á gcur i bhfeidhm ar fud na hÉireann ar bhonn réigiúnach agus tuaithe. Ní bheimid in ann spriocanna ár bplean gníomhaíochta aeráide a bhaint amach ach amháin má bhíonn a fhios ag tiománaithe gur féidir leo luchtú go háisiúil agus go hiontaofa, agus is céim shuntasach eile i dtreo sin é fógra an lae inniu. Is céim thábhachtach í an infheistíocht seo chun a chinntiú do dhaoine nach é an rogha cheart don chomhshaol amháin an t-aistriú go leictreachas, ach gur rogha phraiticiúil í freisin dá dturais laethúla."

Aire Stáit le freagracht as Iompar Idirnáisiúnta agus Bóthair, Lóistíocht, Iarnród agus Calafoirt, Seán Canney

 Maoinítear na moil athluchtaithe tríd an tionscnamh Feithiclí Saothair Éadroma (LDV) atá á oibriú ag Feithiclí Astaíochtaí Nialasacha Éireann (ZEVI) agus á sheachadadh ag Bonneagar Iompair Éireann (TII).

Bhí an chéim seo den tionscnamh dírithe ar bhreis is 2,900km de príomhbhóithre agus de bhóithre tánaisteacha. D’fhéadfadh fiontair ar nós oibreoirí stáisiún peitril/seirbhíse, úinéirí páirceálacha gluaisteán, óstáin, ollmhargaí/ionaid asdíola, agus daoine eile a bhfuil láithreáin inrochtana ag an bpobal acu, iarratas a dhéanamh trí phróiseas deontais iomaíoch le haghaidh maoinithe.

 Is é €9.9 milliún an leithdháileadh iomlán don scéim Céim 3 seo de Fheithiclí Saothair Éadroma. 

“Tá áthas ar TII seachadadh na céime deiridh seo den bhonneagar athluchtaithe EV atá sainaitheanta i bPlean Líonra Bóithre Náisiúnta ZEVI a chur chun cinn. Déanfaidh an scéim an rannchuidiú is suntasaí go dtí seo i dtreo na físe maidir le líonra bonneagair athluchtaithe EV lán-leathan a sholáthar ar fud na mBóithre Náisiúnta go léir. Cruthóidh an líonra seo nasc idir pobail réigiúnacha agus uirbeacha, ag feabhsú muinín úsáideoirí i bhFeithiclí Leictreacha agus ag tacú tuilleadh leis an gcreat Seachain-Aistriú-Feabhsú den Phlean Gníomhaíochta ar son na hAeráide agus le leictriú chabhlach gluaisteán na hÉireann. Beidh seachadadh deiridh chéim 3 den bhonneagar athluchtaithe EV LDV, nuair a chuirtear le chéile é le céimeanna 1 agus 2 de na LDV roimhe seo, ina chéim mhór chun cabhrú le himní raoin a laghdú.”

Príomhfheidhmeannach TII, Lorcan O'Connor

Is céim thábhachtach eile chun tosaigh í an fógra seo i bPlean Líonra Athluchtaithe Fheithiclí Leictrigh na hÉireann, a bhfuil sé mar aidhm aige rochtain iontaofa ar athluchtú feithiclí leictreacha a sholáthar ar fud na tíre, ó mhótarbhealaí agus ó bhóithre tuaithe, chomh maith le cathracha agus bailte beaga.

Tá sé seo mar chuid de Phlean Athluchtaithe EV níos leithne de chuid Líonra Bóithre Náisiúnta ZEVI, a bhronn maoiniú deontais roimhe seo chun 149 pointe athluchtaithe ardchumhachta nua a sheachadadh ag 19 suíomh feadh an líonra mótarbhealaigh/débhealaigh, agus 175 pointe athluchtaithe tapa agus sár-thapa nua ag 53 suíomh feadh an líonra bóithre náisiúnta.

Chomh maith leis sin, comhlánaíonn sé tacaíochtaí eile atá i bhfeidhm cheana féin, lena n-áirítear deontas ceannaigh EV, deontais luchtaire baile, deontais luchtaire árasán, rátaí níos ísle cánach mótair, faoiseamh BIK agus an VRT laghdaithe do EVanna.

Táthar ag súil go mbeidh an bonneagar athluchtaithe EV Céim 3 seo de LDVanna ar fáil lena úsáid ag an bpobal faoi dheireadh Ráithe 1 2026.